Description
සම්මානනීය පකිස්තානු ලේඛිකා ටෙහ්මිනා දුරානිගේ ‘Blasphemy’ නමැති සත්ය සිද්ධියක් පාදක කර ගනිමින් රචිත නවකතාවේ සිංහල පරිවර්තනයයි. ඉස්ලාම් ආගමික නායකයකු, ඉස්ලාම් ධර්මයට මුවාවී, ඒ ධර්මය විකෘති කරමින් තම පහත් අභිමතාර්ථයන් ඉටුකර ගැනීමට ගන්නා උත්සාහය මෙම නවකතාවෙන් නිරූපිතය. පසළොස් වන වියේදී තුන්වැනි බිරිඳ ලෙසින් මෙම ආගමික නායකයා සමඟ විවාහ වන දැරියක්, තම ජීවිත කාලය පුරා ශාරීරිකව මෙන්ම මානසිකව ද ඔහු අතින් විඳි කුරිරු අමානුෂික වධ හිංසා ඇගේ මුවින් පැවසෙන ආකාරයට මෙම නවකතාව නිර්මාණය කර ඇත. තම කුඩා දියණිය සමඟ පවා අනාචාරයේ හැසිරෙන මෙම කාමාතුරයා ගේ තිරශ්චීන කි්රයාවන් සියල්ල ඇසින් දකින, මානසිකව විඳින අසරණ බිරිඳකගේ ශෝකාලාපයයි ඝෝර යාත්රා.
”ඔබ තුමියගේ ස්වාමිපුරුෂයා මාව නිරුවත් කළා. ඔහු මට වරෙන් කම්මුලට ගැහුවා. මගේ කටට රෙදි ඔබා මාව බිමට තල්ලු කරලා දැම්මා. පස්සෙ ඒ අලි මිනිහාගේ බරෙන් මාව පොළොවටම මිරිකුණා. එයාගෙ පපුවෙ තිබුණු රෝමවලින් මගේ කට පිරිලා, මට හුස්ම ගන්නත් බැරි වුණා. මන නැඟිටින්න උත්සාහ කළා…. හැඬුවා. ඔහු මගේ ඔලුවට තඩි පහරවල් දුන්නා. මගේ කන් කරකවා මිරිකා දැම්මා. දෑතම මිට මොලොවා මට පහර දුන්නා. මට ඒ වෙලාවේ දැනුණේ මගේ ජීවිතය ඉවරයි කියලා. එකපාරටම ඔහු නැඟිට්ටා. යෝධයෙක් හිටගෙන මා දිහා ඉන්නවා වගේ මට පෙනුණා. ඔහු පාදයකින් මගේ මුහුණ තදින් පෑගුවා. ඔහු කී දේ මගේ කන් පසාරු කරගෙන ගියා.
‘මට ආපහු උඹේ කටින් වචනයක් එහෙම ඇහුණොත් මං පණපිටින් උඹව හම ගහනවා. මට ආරංචි වුණොත් එකෙක් එක්ක හරි උඹ එක වචනයක් වත් කථා කරලා තියෙනවා කියලා. මං උඹව පොඩි පොඩි කෑලිවලට කපලා උයනවා.
ඔහු මගේ කොණ්ඩෙන් අල්ලා උඩට ඉස්සුවා. මං කකුල් දෙක වේගයෙන් වනලා බිමට පනින්න උත්සාහ කළා. ඔහු අනික් අතින් මගේ උගුරුදණ්ඩ අල්ලා මිරිකුවා. මගේ හුස්ම හිරවෙන්න වගේ ගියා. පස්සෙ ඔහු පලයන්! පලයන්! කියලා කියනවා ඇසුණු ගමන් මගේ පණ කෙන්ද බේරගෙන මං හැකි තරම් වේගයෙන් එළියට දිව්වා.